Pamje nga mbledhja në prefekturën e Vlorës

Prefektja e Qarkut të Vlorës, Evis Allushi, ka mbledhur sot shtabin e emergjencës për të analizuar krizën e ujit që ka mbajtur qytetin pa furnizim të pijshëm prej katër ditësh. Ajo ka lëshuar ultimatumin e qartë:

“Brenda 24 orëve të gjendet zgjidhja dhe qyteti të furnizohet me ujë, ose në të kundërtën do të mbajnë të gjithë përgjegjësi”.

Allushi theksoi se kriza nuk është vetëm detyrë e ujësjellësit apo bashkisë:

“Duhet të angazhohemi të gjithë si institucione. Qyteti është i të gjithëve dhe pa ujë jemi edhe ne si të gjithë qytetarët”. Prefektura ka ngritur grupe pune që do të monitorojnë shpërndarjen e ujit me botë sipas grafikut të UKV-së.

Kjo vjen pas protestave të ashpra të banorëve që kanë bllokuar rrugët dhe kanë kërkuar dorëheqjen e kryebashkiakes Brunilda Mersini, ndërsa Rama premtoi pajisje të reja nga Stambolli./Versus.al

Kryeministri Edi Rama ka reaguar për protestat e qytetarëve të Vlorës, të cilët prej katër ditësh janë pa furnizim me ujë për shkak të një defekti të rëndë në tubacionin kryesor.

Rama shpjegon se problemi është shkaktuar nga pjesë hidraulike të instaluara në vitet 2009-2010, jashtë standardeve, të cilat nuk kanë duruar presionin e ujit.​

Ai publikoi pamje nga transportimi i pajisjeve të reja hidraulike të nisura nga Stambolli, që pritet të mbërrijnë sot për riparimin përfundimtar.

“Drejt aeroportit të Stambollit për të ardhur sot brenda ditës, pjesët e reja hidraulike për riparimin e defektit të rëndë në ujësjellësin e Vlorës”, shkruan Rama.

Kryeministri falenderon punëtorët e ujësjellësit nën drejtimin e Flauers Shoshit dhe kërkon ndjesë nga vlonjatët: “Vlonjatëve të mi u them ndjesë për tërë këtë peripeci të pamerituar dhe siç thoshin gjyshet tona plasi më në fund edhe syri i keq pas tërë këtyre viteve të mira për Vlorën”

“Drejt aeroportit të Stambollit për të ardhur sot brenda ditës, pjesët e reja hidraulike për riparimin e defektit të rëndë në ujësjellësin e Vlorës, ku në vitin 2009-2010 janë instaluar pjesë hidraulike jashtë standardeve, që nuk e kanë mbajtur dot më presionin e ujit dhe për pasojë tubacioni ka shpërthyer…

Respekt për punën e palodhur të punëtorëve të ujësjellësit Vlorë, që nën drejtimin e drejtorit të përgjithshëm të Agjencisë Kombëtare të Ujësjellës-Kanalizimeve, inxhinierit të njohur Flauers Shoshi, i cili prej disa ditësh e netësh gjendet në krye të operacionit të vështirë, po bëjnë të pamundurën për ta mbyllur këtë plagë të hapur në trupin e Vlorës prej një mine të vjetër nga një kohë e zezë për Vlorën

Vlonjatëve të mi u them ndjesë për tërë këtë peripeci të pamerituar dhe siç thoshin gjyshet tona plasi më në fund edhe syri i keq pas tërë këtyre viteve të mira për Vlorën, e ja që kush i do të keqen Vlorës, veç të keqen do i marrë”, thuhet në reagimin e Edi Ramës.

Flauers Shoshi

Pas katër ditësh pa furnizim me ujë, banorët e Vlorës kanë bllokuar mëngjesin e sotëm aksin rrugor kryesor të qytetit në shenjë proteste.

Në vendngjarje ka mbërritur Drejtori i Përgjithshëm i Agjencisë Kombëtare të Ujësjellës-Kanalizimeve, Flauers Shoshi, i cili iu bashkua banorëve dhe kërkoi ndjesë për situatën e krijuar.

Shoshi tha se ekipet teknike kanë ndërhyrë disa herë për riparimin e defektit, por problemet me presionin e ujit e kanë bërë të vështirë zgjidhjen.

Ai shtoi se pajisjet e nevojshme për ndërhyrje përfundimtare janë tashmë në mbërritje, ndërsa puna po vijon me intensitet.

“Furnizimi me ujë do të rikthehet brenda mesnatës së sotme,” garantoi drejtori Shoshi, duke theksuar se autoritetet janë të angazhuara për të rikthyer normalitetin në qytet sa më shpejt të jetë e mundur.

“Kam 72 orë që jam këtu dhe nuk kisha ku të lahem. E di shqetësimin tuaj, ju kërkoj ndjesë për shqetësimin tuaj, problem shqetësim e marrim si të doni juve.

Që ta dëgjojmë dhe të komunikojmë me njëri-tjetrin. Për çfarë të gënjej? Do më dëgjosh tani? Atëhere ju lutem ta respektojmë njëri tjetrin që ta dëgjojmë njëri-tjetrin. Kemi tentuar tre herë ta bëjmë defektin por nuk ja kemi arritur për shkak të presioneve. Nëse nuk besoni hajdeni ta shikoni. Pajisjet janë duke ardhur dhe sot qytetarëve do ti rikthehet furnizimi me ujë në mesnatë. Kjo është fjala ime. Sot në mesnatë do t'iu vijë uji”, tha ai./Versus.al

Ndërkohë që qytetarët e Vlorës prej më shumë se 4 ditësh janë pa ujë dhe sot janë ngritur në protestë përballë bashkisë, kryebashkiakja Brunilda Mersini më shumë se tek gjetja e zgjidhjes fokusohet më së shumti tek organizatorët e protestës.

Teksa pretendon se problemi do të zgjidhet së shpejti, ajo thotë se nuk është momenti për të gjetur përgjegjës dhe se protestat po organizohen nga opozita.

“Mendoj që nuk është momenti të ndajmë përgjegjësitë. Ujësjellësi nuk është në varësi të bashkisë, por është momenti të menaxhojmë këtë fatkeqësi. Lajmi i mirë është se sot testimi ka rezultuar pozitiv në provën e fundit dhe një pjesë e qyteti, pra ajo e Lungomares me një presion minimal për të mos rritur niveli ne riskut derisa të bëjmë zgjidhjen përfundimtare. Pompa në këtë testim gradual do të fillojnë të furnizojnë pjesë të veçanta të qytetit. Por theksoj se në qytet operojnë prej 3 ditësh mbi 15 bote uji, por i kemi dhënë prioritet institucioneve. Protesta organizohet nga opozita dhe nga anëtarët e Këshillit Bashkiak të opozitës. Nuk është momenti që të bëjnë opozitë me një fatkeqësi natyrore. Kjo është një analizë që i takon ndërmarrjes së ujësjellësit. Lajmi i mirë është që pjesa është gjendur dhe është duke mbërritur në aeroportin e Rinasit”, tha Brunilda Mersini. Versus.al

Qindra qytetarë të revoltuar po protestojnë sot para bashkisë së Vlorës për mungesën e ujit prej 4 ditësh. Ata kanë ngritur alarmin për mundësinë e përhapjes së një epidemie, ndërsa kërkojnë që pushteti qendror dhe vendor të mbajnë përgjegjësi për gjendjen.

Njëri prej qytetarëve tha se autoritetet u janë justifikuar duke u thënë se pjesa që ka shkaktuar problemin do të sillet nga Mali i Zi ndërkohë që sipas tij, për atë problem janë bërë tendera me vlerë miliona euro.

“Të shpallet gjendja e jashtëzakonshme, të vijë prefektja, kryebashkiakja, Vlora është në alert, jemi në prag të një epidemie. Kemi hyrë në ditën e pestë pa ujë. Ka 4 ditë që bëjnë propagandë, jo do vijë pjesa nga Mali i Zi, jo nga Selaniku, po pjesët që kanë qenë këtu janë tenderuar miliona euro. Kjo është bashkia e turpit i uzurpatorëve që kanë 26 vite e kanë katandisur Vlorën në këtë derexhe. Zonja e 7% të dali e të japë llogari për 26 vite keqmenaxhim që i kanë bërë. Sot Vlora nuk është më Vlorë. Kryebashkiakja të vijë e të japë shpjegime para qytetarëve, jemi vlonjatët e Ismail Qemalit, jo të huaj”- tha qytetari. Versus.al

Protesta në bashkinë e Vlorës

Ashtu siç kishin njoftuar, qytetarët e Vlorës nisën protestën në orën 10:00 para bashkisë së qytetit duke kërkuar që të futen brenda dhe të takohen me kryebashkiaken Brunilda Mersini.

Kjo e fundit nuk ka bërë asnjë reagim edhe pas protestës së mbrëmshme ku qytetarët e Vlorës u futën në teatër teksa mbahej mbrëmja gala e organizuar nga bashkia në kuadër të festës së Vitit të Ri.

Sot me bidonë në duar, qytetarët kanë kërkuar furnizimin e menjëhershëm me ujë, por edhe dorëheqje të kryebashkiakes Mersini e cila u zgjodh kryetare më 9 nëntor me pjesëmarrjen e 12.54% të qytetarëve me të drejtë vote. Versus.al

Në Vlorë qytetarët janë prej katër ditësh pa ujë të pijshëm në shtëpitë e tyre. skandali vijon edhe ditën e sotme, ndërkohë që vlonjatët kanë paralajmëruar të mbajnë një protest në orën 10:00 para bashkisë.

Defekti i shkaktuar në linjën kryesore të transmetimit ka ndërprerë furnizimin duke krijuar situatë problematike.

Për shkak të këtij problemi, qytetarët janë detyruar të blejnë ujë të ambalazhuar vazhdimisht ose t’u drejtohen burimeve natyrore kryesisht në zonën e Ujit të Ftohtë ku gjatë mbrëmjes kanë mbushur bidonët me ujë.

Gjatë mbrëmjes së djeshme protestuesit e revoltuar prishën mbrëmjen gala të organizuar nga bashkia në teatrin e qytetit me rastin e festave të fundvitit. Versus.al

Deputeti Ardit Bido, protesta e qytetarëve të Vlorës

Vlora prej pothuajse 4 ditësh është në një gjendje alarmante pa ujë në të gjithë qytetin. Mbrëmjen e djeshme, situata u përshkallëzua pasi një grup qytetarësh u mblodhën dhe hynë në teatrin ku bashkia organizonte mbrëmjen gala.

Duke parë gjendjen, deputeti socialist i qarkut të Vlorës, Ardit Bido postoi një shkrim në rrjetet sociale ku pretendonte se situata po shkon drejt normalizimit dhe se problemi mund të zgjidhet brenda të hënës.

“Pas më shumë se 72 orësh pune intensive në terren, ka sinjale pozitive se avaria e rëndë në sistemin e furnizimit me ujë në Vlorë mund të zgjidhet brenda ditës së nesërme. Ka qenë një situatë e vështirë dhe e lodhshme për qytetarët. Shqetësimi i tyre është i drejtë dhe i kuptueshëm, pasi mungesa e ujit për disa ditë rresht nuk mund të jetë realiteti i një qyteti si Vlora. Sipas informacioneve nga terreni, ndërhyrjet janë në fazën përfundimtare dhe po punohet për rikthimin gradual të furnizimit”- shkroi deputeti ndër të tjera.

Por ky reagim i tij nuk është pritur mirë nga ndjekësit e tij në rrjetet sociale, të cilët më së shumti duken të jenë banorë të Vlorës të cilët i kërkojnë që në situatë të tillë të heshtë dhe të mos përpiqet të nxjerrë justifikime.

Mbrëmjen e djeshme pati edhe persona të shoqëruar nga policia për protestën e zhvilluar brenda teatrit të Vlorës. Ndërsa nga ana e kryebashkiakes Brunilda Mersini nuk ka patur asnjë reagim për këto zhvillime të ngjarjeve. Versus.al