Çfarë do të gjeni në brendësi
Frikë për hakmarrje? Policia merr masa për familjen e Nikolla Rradaçit pas aksidentit
Pas aksidentit tragjik në Durrës, ku dy të mitur humbën jetën dhe një tjetër u plagos rëndë, policia ka marrë masa të menjëhershme për të shmangur tensionet në zonë, duke larguar familjen e autorit nga vendngjarja.
Burime nga Policia e Durrësit bëjnë me dije se masa është marrë për të parandaluar çdo incident apo situatë të mundshme hakmarrjeje, ndërsa hetimet për ngjarjen vijojnë.
Autori i aksidentit, Nikoll Radaçi, u arrestua pas ngjarjes së rëndë të ndodhur në zonën e ish-Kënetës. Sipas banorëve të lagjes, ai njihej si një person problematik dhe dyshohet se shpesh drejtonte automjetin me shpejtësi të lartë dhe në gjendje të dehur, duke krijuar shqetësim për sigurinë në komunitet.
Pas ndalimit nga policia, Radaçi ka pranuar se ka qenë nën efektin e alkoolit në momentin e aksidentit dhe ka deklaruar se nuk mban mend çfarë ka ndodhur. Sipas burimeve, ai është shprehur i penduar dhe ka thënë para uniformave blu: “Më vrisni!”./Versus.al
Aksidenti tragjik në Durrës, qytetarët e shumtë ngushëllojnë familjarët e dy të miturëve
Pas tragjedisë së ndodhur në Durrës, ku dy të mitur humbën jetën në një aksident rrugor, ka reaguar edhe shkolla “Demokracia”, ku ata ishin nxënës.
Në një mesazh publik, institucioni arsimor shpreh dhimbjen e thellë për humbjen e dy vogëlushëve, duke e cilësuar ngjarjen si një fatkeqësi të rëndë jo vetëm për familjet, por edhe për gjithë komunitetin shkollor dhe qytetarët që i njihnin.
Shkolla u ka përcjellë ngushëllime familjeve dhe të afërmve, duke theksuar se fjalët janë të pamjaftueshme për të përshkruar dhimbjen e kësaj humbjeje të parakohshme.
Në reagim theksohet gjithashtu se kujtimi i nxënësve do të mbetet gjithmonë i gjallë në zemrat e mësuesve dhe shokëve të tyre, ndërsa u është uruar forcë familjeve për përballimin e kësaj tragjedie të rëndë./Versus.al
Aksidenti tragjik në Durrës, ministrja Koçiu shkon për ngushëllim në familjet e dy vogëlushëve: Le të respektojmë dhimbjen!
Në zonën e ish-Kënetës në Durrës po zhvillohen ceremonitë mortore për dy vogëlushët, Kles Nikolli dhe Enea Muça, të cilët humbën jetën në një aksident tragjik një ditë më parë, pasi u përplasën nga një automjet i drejtuar nga 57-vjeçari Nikoll Radaçi.
Në ceremonitë e lamtumirës janë të pranishëm familjarë, qytetarë, si dhe përfaqësues të institucioneve, mes tyre zv.kryeministrja Albana Koçiu, kryebashkiakja Emiriana Sako dhe disa deputetë, të cilët kanë shkuar për të shprehur ngushëllimet dhe solidaritetin me familjet në këtë moment të rëndë.
Gjatë një prononcimi të shkurtër për mediat, Koçiu ka shmangur komentet mbi ngjarjen, duke theksuar se kjo është një ditë dhimbjeje dhe se institucionet do të marrin të gjitha masat e nevojshme.
Aksidenti ndodhi kur tre fëmijët po qëndronin pranë rrugës dhe u goditën nga një automjet tip “Mercedes-Benz”, i cili dyshohet se ka humbur kontrollin dhe është përplasur me ta. Si pasojë, dy prej të miturve humbën jetën në vend, ndërsa i treti ndodhet në gjendje të rëndë në spital.
Pas ngjarjes, drejtuesi i automjetit u largua nga vendi i aksidentit, por u identifikua dhe u ndalua më pas nga policia./Versus.al
View this post on Instagram
Aksidenti tragjik, pezullohen nga detyra për performancë të dobët 3 drejtues të Policisë Durrës
Policia e Shtetit
Nisur nga aksidenti shumë i rëndë i ndodhur dje, në qytetin e Durrësit, si pasojë e të cilit humbën jetën 2 të mitur dhe u dëmtua një tjetër, Drejtori i Përgjithshëm i Policisë së Shtetit Drejtues Madhor Skender Hita, në zbatim të Rregullores së Policisë së Shtetit, ka pezulluar nga detyra, për performancë të dobët në përmbushjen e detyrave:
-Drejtorin e Drejtorisë Vendore të Policisë Durrës, Drejtues Afrim Tafa;
-Zëvendësdrejtorin për Rendin dhe Sigurinë Publike të DVP Durrës, Kryekomisar Zija Sulaj;
-Shefin e Sektorit të Policisë Rrugore të DVP Durrës, Kryekomisar Kreshnik Skëndo.
Gjithashtu, menjëherë pas ngjarjes, Drejtori i Përgjithshëm i Policisë së Shtetit urdhëroi Drejtorinë e Policisë Rrugore për të ngritur një grup ekspertësh të cilët shkuan në vendngjarje për të analizuar shkaqet dhe rrethanat e aksidentit.
Ndërkohë, Drejtoria e Standardeve Profesionale në Drejtorinë e Përgjithshme të Policisë së Shtetit ka nisur hetimin disiplinor për të vlerësuar nëse ka apo jo përgjegjësi në radhët e punonjësve të Policisë, për këtë rast./Vijon...
U lëndua nga aksidenti tragjik në Durrës, 8-vjeçari te 'Trauma' jashtë rrezikut për jetën
8-vjeçari i plagosur në aksidentin tragjik të ndodhur një ditë më parë në Durrës ndodhet jashtë rrezikut për jetën dhe pritet të transferohet në pavijon.
Sipas burimeve nga Spitali i Traumës, i mituri ka reaguar pozitivisht pas ndërhyrjes së parë mjekësore dhe aktualisht është në gjendje të stabilizuar.
Megjithatë, ai do të vijojë të qëndrojë nën kujdesin e mjekëve për trajtimin e plotë të plagëve të marra si pasojë e aksidentit.
Ngjarja, që tronditi opinionin publik, solli humbjen e jetës së dy fëmijëve të tjerë, ndërsa 8-vjeçari mbetet i vetmi i mbijetuar nga përplasja e rëndë./Versus.al
Përplasi për vdekje 2 fëmijët, Policia: Shoferi ishte i dehur! Iu pezullua patenta 2 herë në 2022!
Policia e Shtetit ka dalë sot me një njoftim më të zgjeruar lidhur me aksidentin tragjik që ndodhi ditën e djeshme në lagjen nr.15, ku një automjet me drejtues Nikoll Radaçin përplasi për vdekje 2 fëmijë dhe plagosi rëndë një tjetër të mitur.
Blutë konfirmojnë zyrtarisht se 57-vjeçari ka qenë në gjendje të dehur teksa ngiste makinën dhe për pasojë ka humbur kontrollin, duke marrë përpara të miturit, 2 prej të cilëve humbën jetën në vend.
Policia sqaron edhe se Nikolla Radaçi rezulton si shofer që është ndëshkuar disa herë për shkelje të rregullave të qarkullimit rrugor.
Vetëm në vitin 2022, 57-vjeçarit i është pezulluar 2 herë leja e drejtimit të makinës, ndërsa është sanksonuar edhe më parë për parakalim të gabuar dhe për tejkalim të shpejtësisë.
Po sipas uniformave blu, drejtuesi i automjetit, pas aksidentit, është larguar nga vendi i ngjarjes, me pretendimin se kishte frikë nga reagimi i qytetarëve, por është konstatuar nga patrulla e Policisë, e cila e ka shoqëruar në Drejtorinë Vendore të Policisë Durrës.
NJOFTIMI I PLOTË I POLICISË:
Durrës/Informacion përfundimtar për aksidentin rrugor shumë të rëndë të ndodhur më datë 03.05.2026, rreth orës 14:10, në rrugën “Ohri”, lagjja nr. 15, në qytetin e Durrësit.
Oficerët e Policisë Gjyqësore, në drejtimin e Prokurorisë, në përfundim të veprimeve të para hetimore të kryera në vendin e ngjarjes dhe me drejtuesin e automjetit që shkaktoi aksidentin, arrestuan në flagrancë shtetasin N. R., 57 vjeç, banues në lagjen nr. 15, Durrës.
Nga tërësia e veprimeve hetimore rezultoi se shtetasi N. R., duke drejtuar automjetin tip “Mercedes-Benz ML”, dyshohet se ka humbur kontrollin mbi drejtimin e automjetit dhe si pasojë automjeti ka dalë nga rruga duke goditur tre fëmijë të moshave 8, 10 dhe 12 vjeç.
Si pasojë e aksidentit, kanë humbur jetën shtetasit e mitur E. M., 12 vjeç, dhe K. N., 10 vjeç.
Ndërsa i mituri tjetër, 8 vjeç, pasi mori ndihmën e parë mjekësore në Spitalin Rajonal Durrës, u transportua për mjekim të specializuar në Spitalin e Traumës, Tiranë.
Drejtuesi i automjetit, pas aksidentit, është larguar nga vendi i ngjarjes, me pretendimin se kishte frikë nga reagimi i qytetarëve, por është konstatuar nga patrulla e Policisë, e cila e ka shoqëruar në Drejtorinë Vendore të Policisë Durrës.
Nga kryerja e testit të alkoolit rezultoi se shtetasi N. R. e drejtonte automjetin, në gjendje të dehur: testi i parë 0.73 mg/l dhe testi i dytë 0.70 mg/l. Gjithashtu, i është marrë edhe kampion gjaku për ekzaminim toksikologjik.
Nga veprimet e para hetimore, dyshohet se shkak i aksidentit është humbja e kontrollit mbi automjetin, si pasojë e drejtimit të tij, në gjendje të dehur.
Gjithashtu, nga verifikimet e historikut të drejtuesit të automjetit rezulton se ky shtetas është ndëshkuar më parë për shkelje të rregullave të qarkullimit rrugor, konkretisht për parakalim të gabuar, në vitin 2020, dhe për tejkalim të shpejtësisë, dy herë, me pezullim të lejes së drejtimit nga 1 muaj, në vitin 2022.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprat penale “Shkelja e rregullave të qarkullimit rrugor”, me pasojë vdekjen e dy personave, “Drejtimi i automjetit në mënyrë të parregullt” (në gjendje të dehur) dhe “Largimi nga vendi i aksidentit”.
Policia e Shtetit iu shpreh familjarëve të të miturve që humbën jetën, ngushëllimet më të ndjera, dhe i uron vogëlushit 8-vjeçar, shërim sa më të shpejtë.
Gjithashtu, fton qytetarët që të bashkëpunojnë me Policinë, për të parandaluar aksidentet rrugore, duke evidentuar dhe ndëshkuar shkelësit e rregullave që sjellin pasoja të rënda për jetën dhe shëndetin e qytetarëve.Versus.al
