Kompania Astronomer, ku deri së fundmi punonin personazhet kryesorë të të ashtuquajturit “çifti Coldplay”, ka reaguar në mënyrë të pazakontë ndaj skandalit që pushtoi rrjetet sociale dhe mediat ndërkombëtare. Në vend të heshtjes apo justifikimeve zyrtare, kompania amerikane ka zgjedhur të kthejë “bad buzz”-in në një gur të artë komunikimi, duke angazhuar vetë Gwyneth Paltrow, ish-bashkëshorten e Chris Martin, këngëtarit të Coldplay, në një reklamë plot humor dhe ironi.
“Përshëndetje, jam këtu për të folur me punonjësit e Astronomer”, nis aktorja fituese e Oscarit në një video të realizuar me ton të lehtë, por mesazhe të qarta. “Kompania ka marrë shumë pyetje këto ditë. Më kanë ftuar të përgjigjem në disa prej tyre,” vazhdon ajo me një buzëqeshje ironike.
Ekrani shfaq një pyetje të prerë në gjysmë: “OMG! What the actual f*”** – një referencë e drejtpërdrejtë ndaj famëkeqes “kiss cam”, që zbuloi lidhjen jashtëmartesore mes ish-CEO-së Andy Byron dhe drejtoreshës së burimeve njerëzore, Kristin Cabot.
Gwyneth, me një të qeshur të përmbajtur, shmang përgjigjen: “Jemi të lumtur që papritur kaq shumë njerëz po interesohen për funksionimin e brendshëm të kompanisë sonë.”
Pyetja tjetër? “Si është ekipi juaj i rrjeteve sociale?”. Përsëri, Paltrow kalon me elegancë mbi çështjen, duke promovuar ngjarjen e radhës të kompanisë në shtator: “Po, ende ka vende të lira për eventin tonë ‘Beyond Analytics’!”
“Tani, le të kthehemi tek ajo që dimë të bëjmë më mirë: t’u ofrojmë klientëve tanë rezultate të jashtëzakonshme,” përfundon ajo, duke i dhënë videomesazhit një kthesë profesionale, por me dozën e duhur të ironisë.
Rasti u bë viral pas një koncerti të Coldplay në Boston, ku një kamera që kapte çiftet në publik i shfaqi Andy Byron dhe Kristin Cabot në një pozicion komprometues, nën duartrokitjet (dhe dyshimet) e të pranishmëve. Vetë Chris Martin e shoqëroi momentin me një batutë spontane: “Ose janë në një lidhje, ose janë shumë të turpshëm” – pa e ditur se kishte zbuluar një lidhje të ndaluar që do të trondiste Astronomer.
Tashmë, të dy kanë dorëzuar dorëheqjet, ndërsa kompania ka vendosur të përballojë krizën me një nga fushatat më të zgjuara të PR-it që kemi parë kohët e fundit – duke përdorur ish-gruan e yllit të Coldplay-t për të “ftohur” atmosferën e nxehtë të skandalit.
Një lëvizje plot guxim, ironi dhe inteligjencë mediatike – tamam si një film ku Gwyneth Paltrow është në rolin kryesor. / Versus
