Në mbylljen solemne të edicionit të 82-të të Festivalit të Filmit në Venecia, u ndanë sot çmimet më të prestigjioze të festivalit, mes të cilave Luani i Artë për filmin më të mirë, së bashku me çmimet për aktorët dhe regjisorët më të spikatur.
Xin Zhilei mori çmimin për Aktoren më të Mirë për rolin e saj në filmin kinez “The Sun Rises on Us All”, një dramë që rrëfen një histori ndjenjash të komplikuara brenda botës së punës.
Ndërkohë, Toni Servillo fitoi çmimin si Aktori më i Mirë për interpretimin e një presidenti në prag të fundit të mandatit në filmin italian “La Grazia”.
Luna Wedler, aktore zvicerane, mori Çmimin Marcello Mastroianni për performancën e re më të spikatur për rolin e saj në "Silent Friend", një tregim poetik i ndarë në tri pjesë për një pemë ginkgo në një qytet universitar mesjetar.
Në kategorinë Horizon, që promovon talente të reja, u nderuan:
“En El Camino” nga David Pablos si Filmi më i Mirë;
Anuparna Roy për Regjinë më të Mirë me filmin “Songs of Forgotten Trees”.
Ceremonia e ndarjes së çmimeve ishte e ngarkuar emocionalisht, me disa prej fituesve që i dhanë hapësirë mesazheve për konfliktet globale në Gaza dhe Ukrainë. Mbrëmja u karakterizua edhe nga një homazh për stilistin legjendar Giorgio Armani, i ndarë nga jeta pak ditë më parë, si dhe nga përshtypjet e forta të publikut për premierat artistike si “Frankenstein” i Guillermo del Toros, si dhe dokumentari për luftën në Gaza “The Voice of Hind Rajab”. / Versus /
Gjykata e Posaçme kundër Korrupsionit dhe Krimit të Organizuar ka lënë në fuqi masën e sigurisë “arrest në burg” për tre nga të arrestuarit në kuadër të megaoperacionit të SPAK për goditjen e trafikut ndërkombëtar të drogës dhe pastrimit të parave.
Në seancën për vlerësimin e masave të sigurisë, gjykata vendosi të mbajë në burg Orest Sotën, Orgest Birçajn dhe Dritan Agën. Ndërkohë, për Gëzim Islamin u vendos lirimi për arsye shëndetësore kundrejt një garancie pasurore prej 100 mijë eurosh.
Katër të arrestuarit dolën para Gjykatës së Posaçme këtë të shtunë, ndërsa seanca nisi në orën 09:00. Procesi u ndërpre për rreth dy orë pas kërkesës së avokatëve mbrojtës, të cilët kërkuan kohë për t’u njohur me aktet hetimore të dosjes.
Pas rifillimit të gjykimit, trupa gjykuese shqyrtoi kërkesat e palëve dhe vendosi masat e sigurisë për secilin prej të dyshuarve.
Në sallëne gjyqit ishin të pranishëm kreu i SPAK, Altin Dumani, prokurorja Elida Kaçkini dhe gjyqtarja Flojera Davidhi.
Megaoperacioni i SPAK ka në fokus goditjen e grupeve të përfshira në trafikun ndërkombëtar të narkotikëve dhe skemat e dyshuara të pastrimit të parave përmes investimeve në sektorin e ndërtimit. Hetimet për këtë çështje vijojnë.Versus.al
