Një ngjarje e pazakontë ka shqetësuar qytetin e Osaka në Japoni, ku një kallëp çeliku i madh, i përdorur për stabilizimin e tokës, “doli nga toka” pranë autostradave, duke shkaktuar alarm dhe ndërprerje trafiku. Lajmin e bëri të ditur një zyrtar lokal për agjencinë AFP.
Sipas raportit, kallëpi nuk ishte aty një ditë më parë. “Nuk ishte aty më parë,” tha zyrtari, duke shtuar se struktura ishte vërejtur për herë të parë në mesjavë në mëngjes.
Struktura gjigante
Cilindri, me një diametër rreth 3.5 metra dhe lartësi prej 13 metrash, u tërhoq gradualisht deri në rreth 1.6 metra të premten në mëngjes, pasi punëtorët derdhën ujë brenda për ta rënduar dhe stabilizuar. Sipas zyrtarëve, kallëpi ishte instaluar fillimisht nën tokë për të parandaluar përhapjen e dheut në zonën e gërmimit.
Dy rrugë kryesore pranë zonës, që të çojnë drejt qendrës së qytetit, u mbyllën për trafikun që nga e mërkura, duke shkaktuar trafikun e rënduar dhe shqetësime për qytetarët. Njëra rrugë u rihap të premten pasdite, ndërsa tjetra pritet të rihapet “së shpejti”, ndërsa autoritetet po shqyrtojnë mundësinë e prerjes së pjesës së mbetur të cilindrit që qëndron ende e ekspozuar.
Hetime në vazhdim
“Ne ende po hetojmë shkakun e incidentit,” deklaroi zyrtari i qytetit, duke theksuar se ngjarja nuk ka precedent të ngjashëm në zonë. Autoritetet nuk përjashtojnë as mundësinë e defekteve strukturore ose ndonjë gabim teknik gjatë instalimit të kallëpit.
Kujtesë e incidenteve të mëparshme
Ngjarja ka rikthyer kujtesën e panikut të vitit të kaluar pranë Tokio, kur një gropë gjigante gëlltiti një kamion dhe shoferin e tij. Ajo ngjarje kishte nxjerrë në pah rreziqet e plakjes dhe dobësisë së tubacioneve dhe infrastrukturës së vjetër në qytetet japoneze, duke rritur shqetësimet për sigurinë e rrugëve dhe ndërtimet nën tokë.
Autoritetet lokale kanë paralajmëruar qytetarët që të shmangin zonën deri në përfundimin e hetimeve dhe rivlerësimit të stabilitetit të tokës.
