Një zbulim i ri në fushën e mjekësisë mund të ndryshojë trajtimin e infarktit, duke hapur mundësinë e rikuperimit të zemrës me vetëm një injeksion.
Studiues të udhëhequr nga profesori Ke Cheng në Columbia University, në bashkëpunim me institucione të tjera në Shtetet e Bashkuara, kanë zhvilluar një terapi të bazuar në “self-amplifying RNA”, një teknologji e ngjashme me vaksinën mRNA.
Trajtimi i jep trupit udhëzime për të prodhuar një hormon natyral që ndihmon në rigjenerimin e muskulit të zemrës pas një ataku kardiak.
Ndryshe nga metodat tradicionale, injeksioni nuk vepron direkt në zemër, por në muskuj, të cilët shndërrohen në “fabrika biologjike” që prodhojnë substancat shëruese për disa javë.
Testimet në kafshë, përfshirë minjtë dhe derrat, kanë treguar përmirësim të ndjeshëm të funksionit të zemrës dhe reduktim të dëmtimeve që zakonisht çojnë në dështim kardiak.
Ekspertët theksojnë se trajtimi është ende në fazën paraklinike dhe nuk është testuar ende tek njerëzit. Provat klinike pritet të jenë hapi i radhës, ndërsa përdorimi i gjerë mund të kërkojë disa vite për verifikime të sigurisë dhe efektivitetit.
Ky zbulim mund të shënojë një hap të madh drejt trajtimeve më efektive dhe më pak invazive për pacientët me probleme kardiake./Versus.al
