Deklarata të reja nga producenti fitues i çmimit Emmy, Jeffrey Mark, kanë rikthyer në vëmendje diskutimet mbi fëmijërinë e Michael Jackson dhe mënyrën si ai e ka përjetuar atë periudhë.
Sipas Mark, i cili ka qenë pjesë e rrethit të ngushtë të këngëtarit, Jackson i kishte thënë gjatë bisedave private se kishte përjetuar situata që ai i perceptonte si “lojë” gjatë fëmijërisë së tij, pa i identifikuar ato si abuzim. Producenti pretendon se kjo mënyrë perceptimi lidhej me mënyrën e edukimit dhe përvojat e hershme të artistit.
Mark ka deklaruar gjithashtu se Jackson nuk përdorte terma si “abuzim” apo “seksual”, por fliste në mënyrë të përgjithshme për “prekje ndërgjeneracionale”, duke sugjeruar se nuk e kishte të qartë natyrën e këtyre përvojave në moshë të vogël.
Deklaratat e tij kanë rihapur debatin publik mbi jetën e Michael Jackson, i cili gjatë viteve u përball me akuza për abuzim seksual, nga të cilat u shpall i pafajshëm në gjykatë në vitin 2005. Çështja është rikthyer disa herë në vëmendjen e publikut përmes dokumentarëve dhe diskutimeve mediatike.
Jackson, i cili ndërroi jetë në vitin 2009 në moshën 50-vjeçare, mbetet një nga figurat më të diskutueshme të muzikës pop, me një trashëgimi artistike të madhe dhe një jetë personale të mbuluar nga polemika dhe pretendime të ndryshme.
