Kryeministri Edi Rama e ka nisur këtë të diel me një reagim në rrjetet sociale, ku ka përgënjeshtruar publikimet që flasin për një projekt ndërtimi në Gjirin e Porto Palermos.
Përmes një videoje, Rama hodhi poshtë pretendimet për ekzistencën e një plani për zhvillime ndërtimore në këtë zonë, duke theksuar se ka kërkuar personalisht mbrojtjen e plotë të gjirit dhe se ai është shpallur monument natyre.
Kreu i qeverisë iu referua edhe gazetarit Klevin Muka, i cili kishte publikuar informacionin, duke pretenduar se materiali është krijuar me ndihmën e ChatGPT.
"Këtu nuk kemi të bëjmë me një interpretim të gabuar të një masterplani, por me një material që e ka bërë vetë me ChatGPT", u shpreh Rama, teksa akuzoi autorët e publikimeve për dezinformim.
Sipas tij, masterplanet e përmendura janë projekte konceptuale të porositura nga subjekte private dhe të përfshira në botimin "Albanian Files", ndërsa një pjesë e tyre nuk janë miratuar nga institucionet shtetërore.
“Këtu nuk kemi të bëjmë me një interpretim të mbrapshtë të këtij masterplani që mund të jetë real. Ka masterplane që mund të jenë reale në librin “Albanian Files” të cilat inkuizicioni i dështak-zemërakëve të kores së zezë të protestës, e ka kthyer në një akt-akuzë për mua.
Dhjetë prej arkitektëve të huaj janë nderuar me Nobel-in e arkitekturës. Këtu nderohen me një akt-akuzë. Janë masterplane të porositura nga subjekte private në troje privatë, që arkitektët kanë zgjedhur t’i vendosin në dosjen e tyre në libër në liri të plotë dhe disa prej tyre janë masterplane të papranuara nga Këshilli i Mbrojtjes së Territorit, provë që Këshilli nuk është fasadë, por institucion serioz.
Megjithatë, inkuizicioni i përdor këto si prova të aktakuzës për tradhtinë time kombëtare, shitjen e atdheut nga unë, gjithë të zezat që dështak-zemërakët m’i faturojnë mua, sepse duan të ngushëllojnë veten për falimentimin e tyre në mediokritet. Por ky agjitator i algoritmit, e ka bërë vetë me Chat GPT.
Kjo është fytyra e dezinformatorëve të paguar të opinionit publik, që e kanë humbur që të rinj pigmentin e zverdhjes dhe të skuqjes dhe që paguajnë urdhrat e kujtdo që i paguan mbi dhe nën dorë.
Ironia në këtë rast, që e zgjodha pasi kemi kthyer disa leje në atë zonë, është bërë edhe një batërdi me tituj pronësie të dhënë kuturu në kohën e copëtimit të madh të pronës në Shqipëri. Unë i kam kërkuar qeverisë të kërkojë mbrojtjen e komplet gjirit të Porto Palermos nga ndërtimet.
E kemi shpallur atë gji, monument të natyrës. Po mbyllim edhe projektin e muzeut të luftës së ftohtës dhe rehabilitimin për qëllime turistike të repartit bashkëngjitur. Jetojmë në kohë të vështirë për të vërtetën, por ky nuk është justifikim, por dhimbje për njerëz të sinqertë që helmohen në kanalet e dezinformimit”, tha Rama mes të tjerash./Versus.al
