Prokuroria e Elbasanit ka ndaluar katër persona të përfshirë në një veprimtari të dyshuar të paligjshme, lidhur me shtrimin e rrugëve në Belsh në kuadër të fushatës elektorale për zgjedhjet e 11 majit. Veprimet janë kryer në mungesë projekti zyrtar dhe pa procedura të rregullta ligjore.
Sipas njoftimit zyrtar, dy punonjës të Inspektoratit të Mbrojtjes së Territorit (IMT) në Bashkinë Belsh, Fation Muça dhe Lorenc Hoxha, janë ndaluar me urdhër të prokurorisë, pasi dyshohet se kanë lejuar subjektin privat “V.H” shpk të kryejë shtrimin e rrugëve në mënyrë të jashtëligjshme.
Hetimet janë përqendruar në dyshimet se ndërhyrjet infrastrukturore janë bërë për qëllime elektorale, me synimin për të ndikuar votuesit në zonë pak ditë para zgjedhjeve. Shkeljet e evidentuara përfshijnë mungesën e dokumentacionit teknik, të projekteve të miratuara dhe procedurave të tenderimit.
Autoritetet po vijojnë hetimet për të zbuluar nëse ka edhe zyrtarë të tjerë të përfshirë në këtë veprimtari të dyshuar, që mund të përbëjë abuzim me detyrën dhe përdorim të burimeve publike për përfitime politike.
Njoftimi i Prokurorisë:
Prokuroria pranë Gjykatës së Shkallës së Parë të Juridiksionit të Përgjithshëm Elbasan, ka regjistruar kryesisht procedimin penal nr. 446 të vitit 2025 për veprën penale të “Shpërdorim detyre”, “Përdorimi i funksionit publik për veprimtari politike ose zgjedhore”, “Ndërtim i paligjshëm” dhe “Moskallëzim i krimit” të parashikuar nga nenet 248, 328/a/4, 199/a/3 dhe 300 i K.Penal,
Në datë 05.05.2025, ora 08:30, nga këqyrja në rrjetin social “Facebook”, është shfaqur postim “Asfalt elektoral në Belsh”, në video dallohet një kamion me mbishkrimin “V. H.” dhe mbrapa saj një mjet që shtron asfalt. Në këmbë gjendet kandidati i një koalicioni zgjedhor shtetasi D.C. Ky shtetas në video mes të tjerash relaton se: “I bëj thirrje Kryetarit të Bashkisë Belsh, që pse shtrohet ky asfalt tani, një javë para zgjedhjeve”.
Në kuadër të këtij procedimi janë kryer disa veprime hetimore si kqyrja e vendit të ngjarjes, kqyrja dhe sekuestrimi i dokumentacionit mbi punimet në rrugë (praktika e mbajtur nga ana e Bashkisë Belsh dhe nga subjekti “V.H” shpk), administrim i deklarimeve të personave që kanë dijeni rreth veprës penale.
Në tërësi të veprimeve hetimore të kryera deri në këto momente, rezulton se ka dyshime të arsyeshme që punonjës të IMT Bashkia Belsh kanë kryer veprën penale të “Shpërdorimit të detyrës” të parashikuar nga neni 248 i Kodit Penal, pasi me mosveprimet e tyre kanë lejuar që subjekti “V.H” shpk të shtrojnë pa projekt rrugë të brendshme në qytetin e Belshit, të dyshuara të kryera në funksion të fushatës elektorale për zgjedhjet e datës 11.05.2025.
Nga ana e subjektit “V.H.” shpk është kryer vepra penale e “Ndërtimit të paligjshëm” parashikuar nga neni 199/a/3 i Kodit Penal. Sa më sipër në datë 10.05.2025 nga Prokurori i çështjes është urdhëruar ndalimi i të dyshuarve për një krim shtetasve Fation Muça, Lorenc Hoxha, Dh.K. dhe B.H.
Nga policia gjyqësore është ekzekutuar ndalimi për dy shtetas, janë ushtruar kontrolle vendesh si dhe është bërë shpallja në kërkim e dy shtetasve Dh.K. dhe B.H. /Versus.al/
