Në qytetin e Vlora u përkujtua këtë të shtunë 29-vjetori i Tragjedia e Otrantos, një nga ngjarjet më të rënda në historinë e emigracionit shqiptar, ku humbën jetën 81 persona.
Familjarë të viktimave, përfaqësues të institucioneve dhe qytetarë morën pjesë në ceremoninë përkujtimore të organizuar në bregdet, ku 81 karrige të lëna bosh simbolizonin jetët e humbura në tragjedi. Në fund të ceremonisë, u hodhën edhe lule në det, në kujtim të viktimave.
Ceremonia u organizua me iniciativë të ministres së shtetit për Marrëdhëniet me Parlamentin dhe deputetes së qarkut Vlorë, Erjona Ismaili, e cila u pa e përlotur gjatë aktivitetit përkujtimor.
Ndërkohë, familjarët e viktimave deklaruan se për ta kjo tragjedi nuk ishte një aksident i thjeshtë, por një ngjarje që, sipas tyre, mund të ishte shmangur. Ata shprehen se prej vitesh kërkojnë drejtësi dhe se vendimet e gjykatave italiane i konsiderojnë të padrejta.
Më 28 mars 1997, një anije shqiptare me 142 persona në bord u përmbys në Ngushticën e Otrantos pas përplasjes me anijen ushtarake italiane. Si pasojë humbën jetën 81 persona, mes tyre fëmijë nga 3 muajsh deri në 69 vjeç, të cilët po largoheshin nga Shqipëria në kërkim të një jete më të mirë pas trazirave të vitit 1997.
Tragjedia e Otrantos mbetet edhe sot një nga plagët më të mëdha në kujtesën e shqiptarëve.
