Parlamenti Europian ka miratuar rezolutën mbi raportin për Shqipërinë për vitin 2025 me 483 vota pro, duke konfirmuar mbështetjen për procesin e integrimit europian të vendit.
Në rezolutën e miratuar janë përfshirë edhe dy amendamente të reja që lidhen me çështjet e ndërtimit në zonat e mbrojtura dhe debatet mbi investimet në Sazan.
Një grup prej 13 eurodeputetësh të Grupit të të Gjelbërve ka propozuar një amendament që kërkon vendosjen e menjëhershme të një moratoriumi për të gjitha lejet e reja të ndërtimit në zonat e mbrojtura. Sipas propozimit, kërkohet pezullimi i çdo procedure të re për leje ndërtimi dhe ndërhyrje zhvillimore, deri në shfuqizimin e dispozitave të ligjit aktual për zonat e mbrojtura, të cilat konsiderohen të papajtueshme me standardet e Bashkimit Europian.
Në tekst theksohet se çdo projekt në këto zona duhet t’i nënshtrohet vlerësimeve të plota të ndikimit në mjedis, në përputhje me standardet e BE-së, si dhe një procesi transparent konsultimi me komunitetet lokale, ekspertët dhe shoqërinë civile.
Rezoluta konsiderohet një sinjal i rëndësishëm politik për procesin e integrimit të Shqipërisë në Bashkimin Europian, duke vendosur njëkohësisht theks të shtuar te mbrojtja e mjedisit dhe respektimi i standardeve europiane në zhvillimet infrastrukturore.Versus.al
