Rreth 40 firma brenda një dite. Mjafton kjo shifër për të kuptuar se në Policinë e Shtetit nuk bëhet fjalë për lëvizje rutinë, por për një riorganizim me peshë në nivelet drejtuese.
Elbasani, një nga qarqet më të ndjeshme për sigurinë, sheh një emër të ri në postin e zëvendësdrejtorit: Andi Banushi. Ndërkohë, Krenar Guçe zhvendoset në Përmet, në një rol operacional si shef rendi; një lëvizje që mund të lexohet si ridimensionim përgjegjësish.
Në terren, ndryshimet janë po aq domethënëse. Alfred Cenaj merr drejtimin e Komisariatit nr. 2, ndërsa Gerald Toska zhvendoset në Fier, një tjetër pikë kyçe në hartën e rendit publik. Në Peqin, një komisariat që ka kaluar turbulenca të fundit në drejtim, emërimi i Erdit Rreçekut sinjalizon përpjekje për stabilizim të brendshëm.
Por goditja më e dukshme është në strukturat e hetimit të krimit. Dritan Muça në Vlorë dhe Dritan Malaj në Berat vendosen në poste kyçe si zëvendësdrejtorë për hetimin, një tregues i qartë se fokusi mbetet tek lufta ndaj kriminalitetit të organizuar në qarqet më problematike.
Një tjetër lëvizje me peshë është ajo e Islor Islamit. Pas dorëheqjes nga drejtimi i Policisë së Lezhës, ai nuk del nga sistemi, por ngjitet në një rol strategjik në Drejtorinë e Përgjithshme të Policisë, në mbështetjen hetimore të krimit të organizuar.
Në pamje të parë, një seri emërimesh. Në lexim të dytë, një riformatim i strukturës drejtuese, ku balancohen eksperienca, presioni publik dhe prioritetet operative./ Versus.al
