Përkeqësimi i kushteve atmosferike ka sjellë masa parandaluese në zonat bregdetare të jugut të vendit. Për ditën e premte parashikohen reshje intensive shiu, shtrëngata dhe stuhi lokale, të shoqëruara me erë të fortë.
Kapiteneria e Sarandës ka vendosur pezullimin e lundrimeve për tragetet, anijet turistike dhe mjetet e peshkimit, për shkak të kushteve të pafavorshme në det. Autoritetet kanë bërë thirrje që mjetet lundruese të mos dalin në det deri në përmirësimin e situatës.
Edhe Bashkia e Vlorës ka paralajmëruar qytetarët dhe vizitorët për përkeqësimin e motit, duke kërkuar shmangien e lëvizjeve të panevojshme dhe tregim të kujdesit të shtuar në plazhe dhe zona pranë detit.
Në njoftimin e saj, Bashkia Vlorë këshillon qytetarët të mos qëndrojnë pranë pemëve apo strukturave të pasigurta, ndërsa apelon që të shmanget ndezja e zjarreve në ambiente të hapura, pyje dhe kullota, për shkak të rrezikut të përhapjes së flakëve.
Për situatën ka reaguar edhe Bashkia Himarë, e cila ka bërë me dije se territori i saj pritet të përfshihet nga reshje shiu, shtrëngata dhe stuhi lokale me intensitet të lartë në intervale të shkurtra.
Autoritetet lokale u kanë kërkuar qytetarëve, bizneseve dhe pushuesve të tregojnë kujdes, të shmangin lëvizjet gjatë përkeqësimit të motit dhe të mos qëndrojnë pranë zonave me rrezik përmbytjeje apo përrenjve.
Strukturat e Mbrojtjes Civile në zonat bregdetare janë vendosur në gatishmëri për monitorimin e situatës dhe ndërhyrje në rast nevoje./Versus.al
