Këshilli i Sigurimit i Kombeve të Bashkuara mblidhet ditën e sotme për të diskutuar sulmin e Izraelit ndaj Iranit. Takimi është kërkuar kërkuar nga Irani me mbështetjen e Algjerisë, Kinës dhe Rusisë.
“Veprimet e regjimit izraelit përbëjnë një kërcënim të madh për paqen dhe sigurinë ndërkombëtare dhe destabilizojnë më tej një rajon tashmë të brishtë”, tha Ministri i Jashtëm i Iranit, Abbas Araqchi në një letër drejtuar këshillit 15 anëtarësh të shtunën.
“Republika Islamike e Iranit, në përputhje me parimet e parashikuara në Kartën e Kombeve të Bashkuara dhe sipas ligjit ndërkombëtar, rezervon të drejtën e saj të natyrshme për përgjigje ligjore dhe legjitime ndaj këtyre sulmeve kriminale në kohën e duhur”, shkroi ai.
Dhjetra avionë izraelitë përfunduan tre valë sulmesh para agimit të së shtunës kundër fabrikave të raketave dhe vendeve të tjera pranë Teheranit dhe në Iranin perëndimor, tha ushtria izraelite.
Ishte një hakmarrje për sulmin e 1 tetorit të Iranit ndaj Izraelit me rreth 200 raketa balistike dhe Izraeli paralajmëroi armikun e tij të armatosur rëndë që të mos kundërpërgjigjet pas sulmit të fundit.
Ambasadori i Izraelit në OKB, Danny Danon hodhi poshtë ankesën e Iranit në Kombet e Bashkuara, duke thënë në një deklaratë të dielën se Irani "po përpiqej të vepronte kundër nesh në arenën diplomatike me pretendimin qesharak se Izraeli ka shkelur ligjin ndërkombëtar".
“Siç e kemi thënë herë pas here, ne kemi të drejtën dhe detyrën të mbrohemi dhe do të përdorim të gjitha mjetet që kemi në dispozicion për të mbrojtur qytetarët e Izraelit”, tha Danon.
Sekretari i Përgjithshëm i OKB-së, Antonio Guterres u bëri thirrje të gjitha palëve që të ndërpresin të gjitha veprimet ushtarake, duke përfshirë Gazën dhe Libanin, të bëjnë përpjekje maksimale për të parandaluar një luftë gjithëpërfshirëse rajonale dhe për t'u kthyer në rrugën e diplomacisë, tha zëdhënësi i tij në një deklaratë. e shtunë. Versus.al
