Mali Sinai, një nga vendet më të shenjta të Egjiptit - i nderuar nga hebrenjtë, të krishterët dhe myslimanët - është në qendër të një debati të ashpër mbi planet për ta shndërruar atë në një mega-projekt të ri turistik. I njohur në vend si Jabal Musa, Mali Sinai konsiderohet nga besimtarët si vendi ku Moisiu mori Dhjetë Urdhërimet. Shumë besojnë gjithashtu se është aty, sipas Biblës dhe Kuranit, që Zoti i foli profetit përmes shkurres që digjej. Manastiri i Shën Katerinës i shekullit të 6-të, i cili vepron nën juridiksionin e Kishës Ortodokse Greke, ndodhet gjithashtu në të njëjtën zonë. Duket se murgjit do të qëndrojnë atje, pasi autoritetet egjiptiane, pas presioneve ndërkobëtare , kanë mohuar se kanë ndërmend ta mbyllin atë. Megjithatë, ka ende shqetësime të forta se si ky vend i izoluar në shkretëtirë - një Vend i Trashëgimisë Botërore të UNESCO-s , që përfshin manastirin, vendbanimin dhe malin - do të transformohet së shpejti në hotele luksoze, vila dhe tregje të cilat janë tashmë në ndërtim e sipër, raporton BBC.
Reagimet që janë provokuar nga plani i qeverisë egjiptiane për të transformuar Malin Sinai - një nga vendet më të shenjta në botë - në një vendpushim turistik luksoz janë theksuar në një artikull të gjerë të BBC-së.
Publikimi përshkruan shqetësimet në lidhje me ndryshimin e trashëgimisë kulturore dhe fetare, nxjerr në pah reagimet e fisit beduin të Jebeliya-s, të cilët i shohin shtëpitë dhe traditat e tyre të kërcënuara. Në të njëjtën kohë, ai paraqet presionet e organizatave ndërkombëtare si UNESCO, për nevojën për të mbrojtur një vend që është një fener shpirtëror dhe një monument me rëndësi globale.
Ndryshimet që po vijnë për Jebeliya-t
Zona është gjithashtu atdheu stërgjyshor i një komuniteti beduin, fisit Jebeliya. Tashmë, anëtarët e saj, të njohur si "Rojet e Shën Katerinës", kanë parë shtëpitë dhe shtëpizat e tyre të ekoturizmit të shemben me pak ose aspak kompensim. Ata madje janë detyruar të zhvendosin trupat nga varrezat lokale për të hapur rrugën për një parking të ri.
Projekti mund të jetë paraqitur nga shteti si një hap i domosdoshëm drejt zhvillimit të qëndrueshëm që do të nxisë turizmin, por u është imponuar beduinëve kundër vullnetit të tyre, thotë shkrimtari britanik i udhëtimeve Ben Hoefler, i cili ka punuar ngushtë me fiset Sinai në të kaluarën. "Ky nuk është zhvillim që kërkuan Jebeliya, por diçka që u është imponuar atyre nga ata në pushtet për t'i shërbyer interesave të të huajve në kurriz të komunitetit lokal", i tha ai BBC-së.
"Një botë e re urbane po ndërtohet rreth një fisi beduinësh me origjinë nomade. Një botë nga e cila ata gjithmonë kanë zgjedhur të qëndrojnë të shkëputur, për krijimin e së cilës nuk kanë rënë dakord dhe e cila do ta ndryshojë përgjithmonë vendin e tyre në atdheun e tyre", shton eksperti.
