Një moment përkujtimi dhe dhimbjeje është shndërruar në një tragjedi të paprecedentë në Veri-Lindje të Anglisë. Norman White, 61 vjeç, ka ndërruar jetë nga një shqetësim i papritur shëndetësor pikërisht në çastin kur arkivoli i djalit të tij, David Beilicki, 41 vjeç, po futej në kapelën e Shën Bedës, pranë krematorit të Teesside.
Ngjarja ndërpreu ceremoninë mortore dhe tronditi thellë familjarët dhe të pranishmit. Ndihma mjekësore ka qenë e menjëhershme, por e kotë: burri ndërroi jetë pak më vonë në spital. Një dhimbje e dyfishtë që goditi një familje tashmë të rënduar nga tragjedi të mëparshme, përfshirë humbjen e dy binjakëve që kishin lindur të vdekur dhjetë vite më parë.
E madhe ka qenë dhe dhimbja e komunitetit të lidhur me një njeri të thjeshtë, por të vlerësuar për përkushtimin ndaj të rinjve dhe sportit. Sipas asaj që kanë raportuar dëshmitarët e pranishëm në ceremoni, Norman White është rrëzuar papritur vetëm pak çaste para se arkivoli i djalit të futej në kapelë. Familjarët ndërprenë menjëherë kortezhin mortor dhe thirrën ndihmën e shpejtë.
Punonjësit shëndetësorë tentuan për një kohë të gjatë ta reanimonin dhe më pas e transportuan në spital, por çdo përpjekje rezultoi e pasuksesshme. Burri ndërroi jetë pak më vonë, si pasojë e një infarkti të papritur. Humbja e dyfishtë ka tronditur të gjithë komunitetin lokal, duke lënë të shokuar miqtë, të njohurit dhe shumë nga të pranishmit në funeral. Ceremonia mortore u ndërpre menjëherë dhe të pranishmit u larguan për t’i lënë vend ndërhyrjes së shërbimeve të emergjencës. / VERSUS /
