Një ngjarje tragjike ka tronditur opinionin publik dhe industrinë ajrore. Një avion Boeing 787 Dreamliner i kompanisë Air India u rrëzua pranë pistës gjatë uljes, duke shkaktuar vdekjen e 242 pasagjerëve në bord dhe 28 personave të tjerë që ndodheshin në ndërtesat përreth zonës së përplasjes.
Ndërsa hetimet vazhdojnë, vëmendja është përqendruar tek kapiteni Sumeet Sabharëal, 56 vjeç, një pilot me mbi 8,000 orë fluturimi, i cili ndodhej vetëm disa muaj larg pensionit. Autoritetet nuk e kanë përjashtuar mundësinë e një akti të qëllimshëm, ndërkohë që profili psikologjik i kapitenit është bërë pjesë kyçe e hetimit.
Sipas ekspertit të aviacionit Mohan Ranganathan, disa pilotë të Air India kanë shprehur shqetësime lidhur me gjendjen mendore të Sabharëal. Thuhet se ai kishte qenë larg kabinës së pilotit për rreth tre deri në katër vjet, duke marrë leje mjekësore. Kohët e fundit, kishte përjetuar humbjen e nënës, dhe megjithëse ishte shpallur i aftë për fluturim, kishte marrë disa ditë pushim për arsye personale.
Burime të brendshme bëjnë me dije se kapiteni po shqyrtonte mundësinë e daljes në pension të parakohshëm, për të qëndruar pranë babait të tij 90-vjeçar, që kishte nevojë për kujdes të përhershëm.
Ky incident ka ringjallur debatet për shëndetin mendor të pilotëve dhe nevojën për vlerësime më të rrepta psikologjike në industrinë e aviacionit, veçanërisht pas rasteve të mëparshme ku gjendja emocionale e ekuipazhit rezultoi faktor vendimtar në aksidente të rënda.
Autoritetet ajrore indiane dhe ndërkombëtare janë duke analizuar të dhënat nga kutia e zezë dhe komunikimet e fundit të ekuipazhit, për të përcaktuar shkaqet e sakta të kësaj fatkeqësie. /Versus.al/
