Një grup eurodeputetësh kërkojnë nisjen e një hetimi për të përcaktuar nëse administrata e presidentit amerikan Donald Trump ushtroi presion ndaj FIFA-s për të anuluar pezullimin e sulmuesit të kombëtares së Shteteve të Bashkuara, Folarin Balogun, pas kartonit të kuq që ai mori në Kupën e Botës.
Balogun u aktivizua në ndeshjen e fazës së 1/16-ave të finales së Kupës së Botës, ku SHBA-ja u mposht me rezultatin 4-1 nga Belgjika, pasi FIFA vendosi të mos zbatojë pezullimin automatik me një ndeshje që parashikohej nga rregullorja për kartonin e kuq.
Sipas një letre që po qarkullon në Parlamentin Evropian dhe që është siguruar nga Euronews, eurodeputetët u bëjnë thirrje 27 federatave të futbollit të vendeve anëtare të Bashkimit Evropian që t'i kërkojnë zyrtarisht FIFA-s hapjen e një hetimi mbi mënyrën se si u mor vendimi për anulimin e pezullimit të lojtarit amerikan.
"Besojmë se ka ardhur koha që federatat evropiane të futbollit, të gjitha anëtare të FIFA-s, të ndërhyjnë dhe të kërkojnë një hetim mbi mënyrën se si u mor ky vendim", thuhet në dokumentin që po mbledh nënshkrime në Parlamentin Evropian.
Një nga iniciatorët e letrës, eurodeputeti irlandez Barry Andrews, deklaroi për Euronews se vendimi i FIFA-s përbën një tjetër shembull të ndërhyrjes së politikës në sport.
"Edhe një herë Gianni Infantino dhe FIFA iu nënshtruan kërkesave të administratës Trump. Ky është një turp dhe një shtrembërim i drejtësisë sportive", u shpreh Andrews.
Debati nisi pasi Balogun mori një karton të kuq të diskutueshëm në ndeshjen e SHBA-së kundër Bosnje-Hercegovinës gjatë javës së kaluar. Sipas rregullave disiplinore të FIFA-s, kartoni i kuq sjell automatikisht pezullimin me një ndeshje, çka do ta linte sulmuesin jashtë sfidës vendimtare ndaj Belgjikës.
Megjithatë, pak para zhvillimit të takimit, FIFA vendosi të pezullojë zbatimin e dënimit, duke përdorur një mekanizëm ligjor që, sipas raportimeve, nuk ishte aplikuar kurrë më parë në një Kupë Bote që prej futjes së sistemit të kartonëve të kuq.
Ndërkohë, presidenti Donald Trump pranoi publikisht se kishte zhvilluar një bisedë telefonike me presidentin e FIFA-s, Gianni Infantino, për të diskutuar kartonin e kuq të Balogun, të cilin e konsideroi të padrejtë. Megjithatë, ai mohoi kategorikisht të kishte ushtruar presion apo të kishte kërkuar favorizim për futbollistin amerikan.
Pas vendimit të FIFA-s, Trump falënderoi publikisht Infantinon për atë që e cilësoi si "korrigjim të një padrejtësie të madhe".
Nga ana e tij, presidenti i FIFA-s deklaroi se gjatë bisedës me Trump i kishte bërë të qartë se organi disiplinor i FIFA-s funksionon në mënyrë të pavarur dhe merr vendimet pa ndërhyrje politike.
Megjithatë, vendimi ka shkaktuar reagime të forta në Evropë.
UEFA e cilësoi anulimin e pezullimit si një vendim "të paprecedentë, të pakuptueshëm dhe të pajustifikueshëm", ndërsa Federata Belge e Futbollit ka dorëzuar një ankesë zyrtare duke vënë në dyshim të drejtën e Balogun për të luajtur në ndeshjen ndaj Belgjikës.
Edhe Komisioneri Evropian për Sportin, Glenn Micallef, e konsideroi anulimin e pezullimit "një vendim të gabuar", ndërsa ish-drejtori për Komunikimin dhe Çështjet Publike në UEFA, William Gaillard, deklaroi për Euronews se vendimi "bie tërësisht ndesh me rregullat dhe statutin e FIFA-s" dhe e cilësoi atë "një skandal".
Letra është iniciuar nga eurodeputetët Barry Andrews, pjesë e grupit Renew Europe, si dhe Lara Wolters dhe Niels Fuglsang nga grupi Socialistët dhe Demokratët. Dokumenti do të mbetet i hapur për nënshkrime deri në afatin e caktuar.
Nënshkruesit kërkojnë që federatat evropiane të futbollit të sigurojnë mbajtjen përgjegjëse të drejtuesve më të lartë të FIFA-s, nëse një hetim do të provojë se janë shkelur rregullat e neutralitetit politik dhe të pavarësisë institucionale.
Në fund të letrës rikujtohet edhe një nismë e mëparshme e 50 eurodeputetëve, të cilët kërkuan hetim lidhur me vendimin e FIFA-s për t'i akorduar presidentit amerikan Donald Trump Çmimin e Paqes të FIFA-s, duke shtuar më tej debatet mbi raportet mes institucionit drejtues të futbollit botëror dhe administratës amerikane./Versus.al
