Presidenti i Shteteve të Bashkuara, Donald Trump, është pritur me ceremoni të veçantë shtetërore në Turqi nga presidenti Rexhep Tajip Erdogan, në kuadër të samitit ndërkombëtar që po zhvillohet në Ankara.
Që në mbërritjen e tij në aeroport, e më pas në Pallatin Presidencial Beştepe, Trump u prit me të gjitha nderimet e larta diplomatike. Ceremonia përfshinte roje nderi, banda ushtarake, tingujt e borive, si dhe të shtëna ceremoniale me topa, ndërsa një qilim ceremonial me ngjyrën karakteristike të Bregut Turk u shtrua për pritjen e presidentit amerikan.
Sipas mediave ndërkombëtare, Erdogan duket i vendosur të theksojë rëndësinë që i kushton marrëdhënieve me Trump, duke i rezervuar një pritje që deri më tani nuk u është ofruar liderëve të tjerë pjesëmarrës në konferencë.
Vetë Trump deklaroi se arsyeja kryesore e pjesëmarrjes së tij në samitin e kësaj jave është marrëdhënia e ngushtë që ka me presidentin turk.
Nga ana e tij, Erdogan vlerësoi praninë e presidentit amerikan, duke u shprehur se Trump po i shton "fuqi dhe forcë" samitit.
Gjatë vizitës, Trump pritet të sinjalizojë edhe qëllimin e administratës së tij për t'i shitur Turqisë avionët luftarakë F-35, një çështje që pritet të jetë ndër temat kryesore të diskutimeve mes dy liderëve.
Në deklaratat e tij për mediat, presidenti amerikan nuk kurseu vlerësimet për Erdoganin dhe Turqinë.
"Ne jemi miq të shkëlqyer", tha Trump, duke lavdëruar aeroportin, infrastrukturën rrugore dhe një ndërtesë për të cilën pretendoi se mbante emrin e tij.
Ai shtoi se Turqia është një vend me të cilin "duhet llogaritur", ndërsa theksoi se marrëdhëniet e tij personale me Erdoganin kanë bërë që bashkëpunimi mes dy vendeve të ecë "shumë mirë"./Versus.al
View this post on Instagram
