Colonia Moscardó, klub i kategorisë së katërt në Spanjë, ka përfunduar në qendër të polemikave pas publikimit të një videoje promovuese të konsideruar fyese dhe diskriminuese.
Në përmbajtjen, e cila më pas u fshi nga rrjetet sociale, presidenti i klubit Javi Poves shfaqet duke i ndjekur disa lojtarë të besimit mysliman me një proshutë iberike, në kuadër të asaj që ishte prezantuar si një “nismë promovuese” e lidhur me një shpërblim për ndeshjen e ardhshme.
Në video dëgjohet edhe fraza “ha mish derri”, element që menjëherë ka nxitur kritika dhe akuza për përmbajtje me sfond fetar dhe diskriminues.
Reagimi i opinionit publik ka qenë i menjëhershëm, duke e detyruar klubin ta fshijë videon. Vetë Poves më pas është përpjekur të mbrohet: “Ishte diçka argëtuese… e hoqëm sepse nuk u pëlqeu të gjithëve, por mendoj se disa duan ta përdorin për ta sulmuar Moscardón”, deklaroi ai.
Më tej shtoi: “Nëse dikush është ndier i ofenduar më vjen keq, por besoj se po shikohet në drejtimin e gabuar.”
Nuk është hera e parë që presidenti përfundon në qendër të polemikave.
Edhe në të kaluarën ai ka qenë protagonist i deklaratave kontroverse dhe iniciativave mediatike që kanë tërhequr kritika dhe sanksione nga autoritetet e futbollit. Ai mund të pezullohet deri në 2 vjet nga Federata Spanjolle e Futbollit. Versus.al
