Plazhet historike të zbarkimit të aleatëve në Francën veriore gjatë Luftës së Dytë Botërore dhe mali Olimp në Greqi janë përfshirë në Listën e Trashëgimisë Botërore të UNESCO-s.
Vendimi u mor gjatë mbledhjes së komitetit të UNESCO-s në Busan të Koresë së Jugut, ku po shqyrtoheshin dhjetëra kandidatura për përfshirje në listën prestigjioze.
Për Francën, UNESCO përfshiu pesë plazhet e zbarkimit në Normandi: Omaha, Utah, Sword, Gold dhe Juno, ku më 6 qershor 1944 zbarkuan më shumë se 150 mijë trupa aleate në operacionin që shënoi një pikë kthese në Luftën e Dytë Botërore dhe kontribuoi në çlirimin e Evropës Perëndimore nga pushtimi nazist.
Sipas Këshillit Ndërkombëtar për Monumentet dhe Vendet (ICOMOS), këto zona ruajnë dëshmi të rëndësishme historike, përfshirë fortifikime gjermane, gjurmë bombardimesh, struktura portuale të aleatëve dhe anije të fundosura.
Ndërkohë, në listë është përfshirë edhe mali Olimp në Greqi, vendi mitik ku, sipas mitologjisë së lashtë greke, besohej se banonin 12 perënditë e Olimpit. Mali, i cili ngrihet në lartësinë 2,918 metra mbi nivelin e detit, u njoh si një pasuri me vlera të ndërthurura kulturore dhe natyrore, për shkak të rëndësisë së tij historike dhe biodiversitetit të pasur.
Përfshirja e malit Olimp erdhi pas një përpjekjeje 12-vjeçare të Greqisë për njohjen e tij nga UNESCO. Autoritetet greke theksuan se ky status sjell edhe përgjegjësi më të mëdha për mbrojtjen e mjedisit dhe menaxhimin e ndikimit të turizmit.
Në listën e re të UNESCO-s u përfshinë gjithashtu qytetet e lashta japoneze Asuka dhe Fujiwara, me 19 site arkeologjike që dëshmojnë formimin e shtetit të parë të centralizuar japonez gjatë shekujve VI–VIII.
Po ashtu, UNESCO njohu edhe Peizazhin Boma-Badingilo në Sudanin e Jugut, i cili bëhet vendi i parë i këtij shteti në Listën e Trashëgimisë Botërore. Zona është e njohur për një nga migrimet më të mëdha tokësore të gjitarëve në botë, ku rreth 6 milionë antilopa dhe gazela lëvizin sezonalisht nëpër savana dhe ligatina.
Komiteti i UNESCO-s ka bërë thirrje për mbrojtje më të fortë të këtyre vendeve, duke paralajmëruar kërcënime nga turizmi masiv, ndryshimet klimatike, ngritja e nivelit të detit dhe zhvillimet industriale pranë zonave të mbrojtura./Versus.al
