Një i dërguar i lartë i Presidentit të SHBA-së, Donald Trump, Paolo Zampolli i ka kërkuar FIFA-s që ta zëvendësojë Iranin me Italinë në Kupën e Botës që do të zhvillohet së shpejti, raportoi të mërkurën Financial Times.
Plani është një përpjekje për të riparuar marrëdhëniet midis Trump dhe kryeministres së Italisë, Giorgia Meloni, pas marrëdhënies së tyre në krizë pas sulmeve të presidentit amerikan kundër Papa Leo XIV për luftën e Iranit, raportoi FT, duke cituar njerëz të njohur me çështjen.
“Konfirmoj se i kam sugjeruar Trump-it dhe Infantinos që Irani të zëvendësohet me Italinë në Kupën e Botës. Do të ishte një ëndërr t’i shihnim ‘Azzurrët’ në Botërorin e Shteteve të Bashkuara. Me katër tituj kampionë, Italia ka trashëgiminë e duhur për të justifikuar përfshirjen e saj,” deklaroi Zampolli për “Financial Times”.
Po kush është Paolo Zampolli?
Paolo Zampolli është një sipërmarrës dhe menaxher italian, i njohur kryesisht për rolet e tij në botën e modës dhe pasurive të paluajtshme, si dhe për lidhjet e tij ndërkombëtare, veçanërisht në Shtetet e Bashkuara. Ndër faktet më të cituara rreth tij është roli që luajti në prezantimin e Melania Trump-it në rrethet e shoqërisë së lartë të Nju-Jorkut gjatë viteve ’90.
Përveç modës, Zampolli ka operuar në sektorin e pasurive të paluajtshme luksoze dhe njihet për afërsinë e tij me qarqet politike dhe të biznesit amerikan, përfshirë lidhjen e ngushtë me Donald Trump-in. Gjatë viteve, ai ka mbajtur edhe role institucionale: ka përfaqësuar Shën Kits dhe Nevis (Saint Kitts and Nevis) në organizata ndërkombëtare dhe ka kryer aktivitete diplomatike.
Precedenti i vitit 2022
Edhe në vitin 2022, gjatë Kupës së Botës në Katar, ambasadori amerikan i kishte kërkuar kreut të FIFA-s, Gianni Infantinos, që Italia të zëvendësonte Iranin.
“Edhe një herë,” fillonte letra e asaj kohe, “bota pret veprimin tuaj udhëheqës për të skualifikuar Iranin nga Kupa e Botës. Si përfaqësues i Presidentit për futbollin në Këshillin për Sportin, Fitnesin dhe Ushqyerjen, vlerësoj se ky qëndrim (i Iranit) mund të dëmtojë më tej pozicionin e tyre. Në nivel personal, dhe nuk jam i vetmi, ëndërroj dhe jam i bindur se do ta shohim Italinë të luajë kundër Anglisë në Kupën e Botës pas skualifikimit të Iranit. Nga sa di unë, Italia është e para në renditjen e FIFA-s nga skuadrat e mbetura jashtë.”/Versus.al
