Ilir Meta ka reaguar nga burgu për hajen e grup-kapitujve të Shqipërisë për anëtarësim në BE.
Në një postim në Facebook, presidenti i Partisë së Lirisë akuzon Edi Ramën se bllokoi për një dekadë integrimin europian të vendit, ndërkohë që vendet e tjera të rajonit janë në një stad më të avancuar.
Ndërkohë që progres raporti i BE-së vlerësonte SPAK-un, Meta thekson se problemi i vetëm i Shqipërisë është kapja e shtetit dhe e drejtësisë nga mafia.
Sipas tij, premtimi i Ramës se brenda tre vitesh do të mbyllen negociatat është si premtimi për shëndetësi fals apo për ujin e pijshëm para ardhjes në pushtet.
Reagimi i Ilir Metës:
Ekzaltimi fals i Kryeministrit Rama për grupkapitujt, pasi e bllokoi integrimin europian të vendit për një dekadë është tregues i hipokrizisë dhe papërgjegjshmërisë të tij dhe bandës së “Rilindjes” për këtë proces që duhej të ishte përmbyllur prej kohësh.
Shqipëria nënshkroi Marrëveshjen e Stabilizim Asocimit më 2006, para Malit të Zi, Serbisë dhe vendeve të tjera, që e nënshkruan atë vite më pas.
Ndërkohë ato i çelën negociatat më 2012 dhe 2014 dhe janë në një stad shumë më të avancuar edhe pse kishin problem me Gjykatat Ndërkombëtare dhe konflikte ndëretnike.
Ndërsa Shqipëria ka patur e ka vetëm një problem, kapjen e shtetit nga mafia dhe sidomos kapjen e drejtësisë, e cila nga një reformë me 140 vota, përfundoi me 69 vota dhe betime gjyqtarësh te noteri te Lana.
Ndaj indekset e drejtësisë janë më zi se Vietnami komunist apo Bjellorusia e Lukashenkos.
Ky zhvillim edhe pse shumë i vonuar është vetëm për arsye gjeopolitike dhe se s’mund të vazhdojë më shumë.
Ndërsa premtimi solemn se brenda tre vitesh do mbyllen negociatat është fiks si premtimi i mbajtur para ardhjes në pushtet të “Rilindjes” për “shëndetësinë falas” apo premtimi se brenda një mandati do zgjidhej problemi i ujit të pijshëm në të gjithë vendin.
Beteja e Partisë së Lirisë dhe opozitës të vërtetë kundër kapjes së shtetit dhe rikthimit të llogaridhënies do të zhbllokojë edhe procesin e integrimit europian.
