Autoriteti i Konkurrencës ka njoftuar sot hapjen e një hetimi paraprak ndaj kompanisë “SHPRESA – AL SHPK”, pas rritjes së çmimit të biletës në linjat urbane Kamëz–Tiranë–Kamëz dhe Paskuqan–Babrru–Tiranë.
Hetimi vjen pas ankesave nga qytetarë dhe shqetësimeve publike për rritjen e tarifave pa analiza justifikuese.
Sipas njoftimit, kompania “SHPRESA – AL SHPK” është operatori i vetëm i licencuar në këto linja, duke zotëruar pozitë dominuese në tregun e transportit publik në Bashkinë Kamëz.
Nga vlerësimi fillestar i Konkurrencës, rezulton se mungojnë analiza ekonomike dhe financiare që të justifikojnë rritjen e çmimit të biletës.
Rritja e fundit e vendosur me vendim të Këshillit Bashkiak të Kamzës e çoi çmimin e biletës në 50 lekë, ose 10 lekë më shumë se dy muaj më parë, ndërsa çmimi i abonesë mujore u rrit në 1,400 lekë.
Autoriteti i Konkurrencës bën të ditur se hetimi do të mbulojë periudhën 1 janar 2025 – 12 dhjetor 2025, ndërsa rezultatet dhe çdo vendimmarrje e mëtejshme do të bëhen publike pas përfundimit të procedurës.
Njoftimi:
Autoriteti i Konkurrencës hap hetim paraprak në transportin urban në Kamëz
Pas ankesave dhe shqetësimeve publike për rritjen e çmimeve të biletave dhe aboneve, Autoriteti i Konkurrencës ka vendosur hapjen e hetimit paraprak ndaj SHPRESA – AL SHPK.
Linjat e përfshira
· Kamëz – Tiranë – Kamëz
· Paskuqan – Babrru – Tiranë
SHPRESA – AL SHPK rezulton operatori i vetëm i licencuar, duke zotëruar pozitë dominuese në treg.
Nga vlerësimi paraprak, mungojnë analiza ekonomike dhe financiare që të justifikojnë rritjen e tarifave.
Periudha e hetimit: 1 janar 2025 – 12 dhjetor 2025
Autoriteti i Konkurrencës do të vijojë me trajtimin e çështjes dhe do të informojë publikun për rezultatet e procedurës dhe çdo vendimmarrje të mëtejshme.
Po ashtu, Bashkia Kamëz ka rritur edhe çmimin e abonesë mujore, në 1400 lekë, ndërsa çmimi i abonesë së përgjithshme është caktuar 1600 lekë./Versus.al
