Një ngjarje e rëndë ka tronditur qytetin e Barit në Itali, ku një studente 26-vjeçare u dhunua brutalisht në parkun Rossani, ndërsa autoritetet kanë identifikuar të paktën tre persona të dyshuar për sulmin.
Giuditta d'Elia u sulmua pasditen e së enjtes në ambientet e tualeteve publike të parkut. Sipas hetimeve paraprake, e reja ishte drejtuar aty për të përdorur tualetin, por kërkesa e saj ishte refuzuar. Në atë moment nisi një debat, i cili më pas degradoi në një agresion të dhunshëm.
Sipas rindërtimit të ngjarjes nga policia dhe mediat italiane, vajza e një gruaje që punon për kompaninë që administron tualetet e parkut e goditi studenten me një pistoletë uji. Giuditta ka deklaruar se e preku vajzën vetëm për ta larguar, por ky veprim u pasua nga reagimi i dhunshëm i të pranishmëve.
Dy të rritur dyshohet se e rrëzuan 26-vjeçaren në tokë dhe e goditën me grushte e shqelma në kokë dhe fytyrë. Në sulm morën pjesë edhe disa të mitur, mes tyre edhe vajza që mbante pistoletën me ujë.
Si pasojë e dhunës, studentja pësoi lëndime të rënda, përfshirë thyerje të hundës dhe plagë të shumta në fytyrë. Mjekët kanë vlerësuar se asaj do t'i nevojiten rreth 40 ditë për t'u rikuperuar.
Policia lokale e Barit ka identifikuar tashmë të paktën tre persona, të cilët hetohen për veprën penale të plagosjes së rëndë. Raporti i parë hetimor i është përcjellë Prokurorisë, ndërsa kamerat e sigurisë të zonës janë sekuestruar dhe pritet të ndihmojnë në zbardhjen e plotë të ngjarjes dhe identifikimin e të gjithë të përfshirëve.
Në denoncimin e bërë pranë autoriteteve, Giuditta d'Elia ka identifikuar katër persona konkretë si autorë të agresionit. Ndërsa në reagimin e saj të parë publik, ajo kishte deklaruar se në sulm morën pjesë edhe rreth dhjetë fëmijë të moshës 8 deri në 14 vjeç.
Ngjarja ka shkaktuar reagime të forta në Itali. Kryebashkiaku i Barit, Vito Leccese, ka njoftuar se Bashkia do të paraqitet si palë civile në procesin gjyqësor kundër autorëve të dyshuar.
Pas sulmit, 26-vjeçarja publikoi një video në rrjetet sociale ku shfaqet me fytyrën e mavijosur, duke shpjeguar se vendosi të mos i fshihte plagët.
"Doja ta tregoja fytyrën time, sado e dëmtuar dhe e mavijosur të ishte", u shpreh ajo, ndërsa falënderoi të gjithë ata që i kanë shprehur mbështetje pas ngjarjes.
View this post on Instagram
