Një aksident fatal ka tronditur provincën e Padovës, ku një punëtor shqiptar, Zevxhet Halili, 59 vjeç, humbi jetën gjatë kryerjes së detyrave të përditshme. Zevxheti, i cili jetonte në komunën e Sant’Elenës, punonte për kompaninë e shërbimeve mjedisore “Sesa” në Este.
Tragjedia ndodhi më 9 janar, rreth orës 16:30, në Via Comuna të Ospedaletto Euganeo. Sipas raportimeve paraprake, gjatë punimeve të mirëmbajtjes, ai u shtyp nga një makineri presëse, duke u bërë viktimë e një aksidenti të papritur.
Skena para syve të kolegëve ishte e tmerrshme. Menjëherë ata ngritën alarmin, dhe ekipi i ndihmës së shpejtë mbërriti në vendngjarje, por përpjekjet për të shpëtuar jetën e Xhevdetit rezultuan të pasuksesshme ai ndërroi jetë në vend.
Ky është aksidenti i dytë fatal që nga fillimi i vitit në provincën e Padovës. Më 5 janar, 65-vjeçari Fabrizio Braghetto kishte humbur gjithashtu jetën në Borgoricco.
Autoritetet lokale kanë izoluar zonën, ndërsa trupi i Zevxheti është dërguar në Institutin e Mjekësisë Ligjore për ekspertizë të mëtejshme. Karabinierët dhe teknikët e Spisal po hetojnë shkaqet e aksidentit për të përcaktuar nëse ai ishte shkaktuar nga një defekt i makinerisë, nga një sëmundje e papritur apo një moment i pakujdesisë.
Ngjarja ka lënë një hije të rëndë mbi komunitetin shqiptar dhe kolegët e tij, duke rikujtuar rrezikun e vazhdueshëm që punëtorët përballen në vendet e punës.
