Çfarë do të gjeni në brendësi
*Policia ka zbardhur ngjarjen e ndodhur ditën e djeshme në Balldren të Lezhës ku u ekzekutuan çifti i bashkëshortëve Kreshnik e Gentiana Mujeci të cilët po qarkullonin me një automjet tip “Audi Q7”. *Krimi i rëndë ka ndodhur për motive gjakmarrje dhe janë shpallur në kërkim tre persona, konkretisht Florin Mhillaj, Renato Mhillaj dhe Adriano Mhillaj. Renato rezulton të jetë djali i Genc Mhillajt, personit që dyshohet se në 2016-ën u vra nga vëllezërit Mujeci. Ndërsa dy të tjerët janë nipat e Genc Mhillajt. *Për të kryer vrasjen, autorët kanë përdorur dy automjete. Ndërkohë edhe forcat RENEA janë angazhuar për kapjen e tyre.
Vepruan pa maska, dalin fotot e 2 prej autorëve që ekzekutuan çiftin e bashkëshortëve
Personat që shihni në foto janë Florin dhe Renato Mhillaj, dy prej autorëve të dyshuar të vrasjes së çiftit Kreshnik e Gentiana Mujeci ditën e djeshme në Balldren të Lezhës.
Renato rezulton të jetë djali i Genc Mhillajt, personit që u vra në 2016-ën nga vëllezërit Mujeci. Dyshohet se vrasja ndodhi për motive hakmarrje.
Ndërsa sipas informacioneve, kamerat e sigurisë kanë filmuar autorët të cilët nuk mbanin maska dhe kanë vepruar me gjakftohtësi të plotë duke zbrazur dhjetëra plumba në drejtim të çiftit të ndjerë. Versus.al
“Vrasja e çiftit për hakmarrje”, kreu i policisë Lezhë: Identifikuam 3 autorët, po i kërkon RENEA (EMRAT)
Tre persona janë identifikuar dhe shpallur në kërkim si autorë të vrasjes së çiftit Kreshnik e Gentiana Mujeci. Bëhet fjalë për Adriano Mhillaj, 22 vjeç, Florin Mhillaj, 36 vjeç dhe Renato Mhillaj, 23 vjeç të cilët dyshohet se e kanë kryer krimin për hakmarrje.
Raportohet Renato Mhillaj është djali i Genc Mhillajt, i cili u vra në vitin 2016 nga vëllezërit Lin, Jozef dhe Kreshnik Mujeci.
“Është identifikuar njëri prej automjeteve të përdorura nga autorët i markës A4. Në vijimtë hetimeve të thelluara u bë i mundur identifikimi i autorëve të dyshuar, A.M 22 vjeç, F.M 36 vjeç dhe R.M, 23 vjeç, banues në Lezhë. Mjeti “Audi” ka mbajtur në vëzhgim lëvizjet e viktimave. Dyshohet se vrasja ka ndodhur për arsye hakmarrje. Pas identifikimit të autorëve janë ushtruar kontrolle në disa banesa, por nuk janë gjetur dhe janë shpallur në kërkim. Operacioni vijon me përfshirjen e forcave RENEA”- njoftoi kreu i policisë Lezhë, Arben Nasufi.Versus.al
Vrasja e çiftit në Lezhë, policia mësyn në familjen Mhillaj, por nuk gjen njeri në banesë
Policia ka mësyrë për kontroll ditën e sotme në banesën e familjes Mhillaj për të marrë në pyetje disa persona lidhur me vrasjen e çiftit Kreshnik e Gentiana Mujeci të ndodhur ditën e djeshme në Balldren të Lezhës.
Mirëpo personat e caktuar për t’u pyetur si persona në dijeni, nuk janë gjetur në banesë dhe për këtë arsye janë shpallur në kërkim policor.
Lidhja e familjes Mhillaj
Viktima Kreshnik Munjeci, ishte i përfshirë më parë në vrasje, ngjarje e ndodhur në vitin 2016. Vëllezërit Lin, Jozef dhe Kreshnik Mujeci akuzohen se kanë vrarë Gegë Mëhillin i njohur edhe si Gent Mëhilli apo Gent Pjetri në në rrugën Shkodër Velipojë.
Për vrasjen e Mhillaj ndodhet në burg Jozef Mujeci. Megjithatë ende nuk dihet nëse vrasja e ndodhur ditën e djeshme ka lidhje me ngjarjen e ndodhur disa vite më parë. Versus.al
Dhjetëra plumba u zbrazën drejt tyre! Dinamika e ekzekutimit të çiftit në Lezhë, një mjet u bllokoi rrugën
Plot 30 gëzhoja plumbash janë gjetur në vendin ku ndodhi atentati ku mbetën të vdekur burrë e grua, Kreshnik e Gentiana Mujeci në fshatin Balldre të Lezhës.
Në atentat dyshohet se janë përdorur dy automjete. Njëri prej tyre ka shërbyer si mjeti që u ngriti pritë viktimave, duke i prerë rrugën mjetit tip “Audi Q7” me të cilin udhëtonin çifti i bashkëshortëve. Ndërsa mjeti tjetër, u përdor nga autorët për të kryer sulmin vdekjeprurës.
Hetimet e deritanishme sugjerojnë se dy persona kanë zbritur nga automjeti dhe kanë hapur zjarr drejt makinës së viktimave. Sulmi ka qenë i shpejtë dhe i mirëorganizuar. Pas ekzekutimit barbar, autorët u larguan me shpejtësi, ndërsa policia ende vijon punën për identifikimin dhe kapjen e autorëve.
Po hetohen edhe pistat e konflikteve të mëparshme që mund të ketë patur Kreshnik Mujeci. Versus.al
