Pak ditë pas takimit të tyre në samitin e G7, presidenti amerikan Donald Trump dhe kryeministrja italiane Giorgia Meloni kanë shkëmbyer disa deklarata të ashpra.
Gjithçka nisi nga Trump, i cili pavarësisht se u duk se mes tyre gjithçka shkonte mire, ka rikthyer kritikat ndaj lideres italiane, duke u shprehur se ajo ishte e interesuar për vëmendjen e tij.
Në një intervistë për emisionin “L’Aria che Tira” në televizionin italian La7, presidenti amerikan deklaroi se Meloni kishte kërkuar të bënte një foto me të.
“Me shumë gjasa ajo është e lumtur që i fola. M’u lut të bëja një foto me të, më erdhi keq për të”, u shpreh Trump, duke lënë të kuptohet se kryeministrja italiane kishte kërkuar afrim politik dhe personal me të.
Deklaratat e tij kanë shkaktuar reagimin e menjëhershëm të Melonit, e cila i ka cilësuar pretendimet si të pavërteta dhe fyese.
“Jam e habitur. Nuk e kuptoj pse presidenti amerikan sillet në këtë mënyrë me aleatët e tij. Nuk është hera e parë që ndodh”, deklaroi ajo.
Kryeministrja italiane kritikoi gjithashtu qasjen e Trump ndaj aleatëve perëndimorë, duke thënë se ai tregohet më i ashpër me partnerët sesa me kundërshtarët e Perëndimit.
“Mund të them vetëm se më vjen keq që nuk tregon të njëjtën vendosmëri ndaj armiqve të Perëndimit dhe ndaj liderëve me të cilët tregohet shumë më i butë. Një gjë duhet ta mbajë mend: unë dhe Italia nuk përgjërohemi kurrë”, u shpreh Meloni.Versus.al
