Në një fushatë të pazakontë për mbledhje fondesh, Donald Trump u ka kërkuar përkrahësve të tij një donacion prej 15 dollarësh me një mesazh që ka ngjallur reagime të shumta:
“Dua të përpiqem të shkoj në parajsë.”
Fushata, e quajtur “24-Hour Trump Fundraising Blitz”, u lançua në fund të gushtit dhe përmes një emaili emocional, ish-presidenti shkruan se vitin e kaluar “i shpëtoi vdekjes” dhe se kjo ndodhi për një arsye:
“Zoti më shpëtoi që unë ta bëj Amerikën sërish të madhe!”
Trump e paraqet veten si të zgjedhur nga një fuqi më e lartë dhe thotë se i duhet ndihma e mbështetësve për ta përmbushur këtë mision.
“Nuk kam zgjidhje tjetër veçse t’i përgjigjem thirrjes së detyrës. Por nuk mund ta bëj vetëm. Ndaj po ju kërkoj nga 15 dollarë që ta çojmë këtë fushatë në një nivel të jashtëzakonshëm.”
“Dua të shkoj në parajsë” – Trump dhe mesazhet shpirtërore
Vetëm pak ditë më parë, në një intervistë për Fox News, Trump kishte bërë një deklaratë që zgjoi kuriozitet:
“Dua të përpiqem të shkoj në parajsë, nëse është e mundur. Kam dëgjuar se nuk jam në gjendje të mirë. Jam në pikën më të ulët.”
Kjo deklaratë, së bashku me emailin e fundit, ka shkaktuar reagime të shumta, sidomos në rrjetet sociale, ku shumë përdorues i janë qasur me ironi apo dyshim.
Fushata e Trump është shoqëruar me kritika të forta, veçanërisht për përzierjen e temave fetare me kërkesa për mbështetje financiare.
Disa komentues dhe analistë politikë e kanë quajtur këtë lëvizje si “manipulim emocional”, ndërsa të tjerë thonë se është thjesht një tjetër strategji për të mbledhur para në prag të fushatës presidenciale të vitit 2024.
Pavarësisht kritikave, duket se Trump po e ndërton gjithnjë e më shumë fushatën e tij mbi një imazh të mbinatyrshëm – si i shpëtuar nga Zoti dhe i ngarkuar me një mision hyjnor. / Versus /
