Çfarë do të gjeni në brendësi
*Partia Demokratike ka mbledhur sot në Pallatin e Kongreseve delegatët e Kuvendit Kombëtar për atë që e ka quajtur “procesi i ripërtërirjes”. *Kuvendi nisi me fjalën e avatarit IA të heroit kombëtar, Gjergj Kastriot Skënderbeu dhe më pas edhe me fjalën e kryeministrit të Kroacisë, Andrej Plenkoviç i cili tha se kishte patur një bisedë të gjatë me Berishën për reformimin e partisë. *Gjatë Kuvendit të sotëm do të miratohen disa ndryshime në statut si dhe do të votohen anëtarët e rinj të Këshillit Kombëtar.
"Pas otomanëve, Rama na ka kushtuar më së shumti", Kuvendi Kombëtar i PD nis me avatarin IA të Skënderbeut
Kuvendi Kombëtar i Partisë Demokratike në Pallatin e Kongreseve ka nisur me fjalën e mbajtur nga avatari IA i heroit kombëtar, Gjergj Kastrioti Skënderbeu. Me fjalët e përgatitura nga departamenti i PD, avatari i Skënderbeut foli për “Diellën” dhe për gjendjen ku ndodhet vendi duke fajësuar kryeministrin Edi Rama si një prej dëmtuesve më të mëdhenj që pas osmanëve.
“Jam unë, Gjergj Kastriot Skënderbeu. Në fakt jam një avatar i krijuar nga departamenti i IA i PD. Ndryshe nga avatari i Ramës, “Diella” që ka kushtuar 4 milionë euro, unë kam kushtuar vetëm 100 euro. Edi Rama po i kushton shumë Shqipërisë. Që nga pushtimi ottoman askush nuk i ka kushtuar më shumë vendit tonë”- tha avatari IA. Versus.al
Kandidon për Këshillin Kombëtar të PD, reperi Stresi në Pallatin e Kongreseve! E shoqëron i ati Sali Lushaj
Reperi Arkimed Lushaj, i njohur ndryshe si “Stresi” ëhstë parë sot në Pallatin e Kongreseve i shoqëruar nga babai i tij Sali Lushaj dhe njerëz të afërm.
Sot pritet të mbahen punimet e Kuvendit Kombëtar të PD ku do të zgjidhen strukturat e reja të partisë dhe gjithashtu do të mbahen zgjedhjet për anëtarët e këshillit kombëtar, ku mes kandidatëve është edhe Stresi.
Ky i fundit e zyrtarizoi vetë lajmin ditën e djeshme duke bërë me dije se kishte pranuar propozimin e bërë nga kryedemokrati Sali Berisha dhe u bëri thirrje të rinjve që të marrin në dorë fatet e vendit.
“Kam vendosur të hedh një hap më shumë për vendin tim, për të rinjtë dhe për zërin e një brezi që shpesh është ndjerë i papërfaqësuar. Kandidimi im për Këshillin Kombëtar të PD-së nuk është thjesht politikë është përgjegjësi, përfaqësim dhe besim tek rinia shqiptare.
Kam ardhur nga rruga, nga jeta reale, nga sfidat që çdo i ri i njeh mirë. Prandaj dua që zëri ynë të dëgjohet aty ku merren vendimet. Nuk ka më kohë për heshtje, për largime apo për dorëzim. Ka ardhur koha që rinia të ngrihet, të flasë dhe të marrë vendin që meriton.
Ftoj çdo të ri që beson te ndryshimi, te energjia e re dhe te Shqipëria që mund të bëhet më mirë, të bashkohet me mua në këtë rrugëtim. Sepse e ardhmja nuk pret. Dhe ajo ndërtohet nga ne”, shkroi Stresi. Versus.al
PD mbledh sot Kuvendin Kombëtar, priten ndryshime në statut dhe rifreskim i Këshillit Kombëtar
Partia Demokratike do të mbledhë sot Kuvendin Kombëtar ku pritet që kreu i grupit parlamentar Gazment Bardhi të paraqesë propozimet për ndryshimet statutore që do t’i nënshtrohen diskutimit dhe miratimit nga delegatët.
Në rendin e ditës është parashikuar edhe miratimi i përbërjes së re të Këshillit Kombëtar, një strukturë kyçe në organizimin dhe funksionimin e partisë. Risi këtë herë është edhe kandidimi i personazheve të muzikës si rasti i reperit Stresi i cili shpalli dje kandidaturën e tij.
Kuvendi Kombëtar pritet të përcaktojë edhe drejtimet politike dhe organizative që Partia Demokratike do të ndjekë në periudhën e ardhshme. Ndryshimet nuk do të prekin të ashtuquajturin “Neni Basha”, i cili parashikon kufizime për drejtuesit që humbasin zgjedhjet, si dhe mekanizmin e Primareve për përzgjedhjen e kandidatëve. Versus.al
