Në emisionin e njohur “Opinion”, Blendi Fevziu prezanton dokumentarin e ri “Shtëpia e Kombit”, një projekt i realizuar nga producentja dhe skenaristja Helena Halilaj, që rikthen në vëmendje një nga periudhat më të dhimbshme dhe më të rëndësishme të historisë sonë kombëtare: Eksodin e shqiptarëve të Kosovës në vitin 1999 dhe mikpritjen e jashtëzakonshme nga familjet kuksiane.
Helena Halilaj, një figurë e njohur në botën e artit si pedagoge dhe poete, tani vjen dhe si producente, skenariste filmash dokumentarë.
Dokumentari nis me një zë të vjetër që hap valët e Radio Kukësit, duke rikujtuar se si kjo radio u bë një pikë referimi për mijëra familje kosovare që kërkonin strehim dhe mbrojtje.
Kjo pamje përfaqëson frymën e mikpritjes së pakushtëzuar që karakterizonte Kukësin gjatë asaj kohe. Helena Halilaj, vetë 10 vjeç në kohën e luftës, përdor kujtimet e saj personale si motiv për të ndërtuar rrëfimin. kur shtëpia e saj u mbush me shqiptarë të Kosovës që kërkonin strehim dhe siguri.
Ajo sjell një perspektivë të fëmijës që përjetoi eksodin, duke treguar jo vetëm dhimbjen dhe pasigurinë, por edhe solidaritetin dhe humanizmin që shfaqën familjet shqiptare në Kukës.
Këto kujtime të hershme u shndërruan në një motiv të fortë për të realizuar këtë dokumentar, me qëllimin për të vlerësuar dhe lartësuar kontributin e familjeve kuksiane gjatë asaj periudhe.
Përmes rrëfimeve të gjalla, dokumentari e sjell audiencën afër ngjarjeve, duke i dhënë zë të gjithë atyre që kontribuuan në këtë periudhë historike.
Filmi “Shtëpia e Kombit” përfshin dëshmi nga figura të njohura dhe pjesëmarrës të drejtpërdrejtë të eksodit: mjekë, gazetarë dhe personalitete publike, përfshirë Gjeneralin Kudusi Lama dhe ish-kryeministrin Pandeli Majko si dhe me mbështetjen profesionale të gazetarit Blendi Fevziu
Materialet filmike arkivore nga Instituti i Krimeve të Luftës në Kosovë i japin dokumentarit një dimension autentik dhe historik. Regjia artistike e Burim Halitit i jep rrëfimit një ndjeshmëri të veçantë, duke ndërthurur momentet intime të familjeve me panoramën e madhe historike të asaj kohe.
Ky dokumentar nuk është thjesht një studim historik; ai është një homazh për mikpritjen, sakrificën dhe solidaritetin njerëzor.
Përmes këtij projekti, Helena Halilaj synon të rikthejë vëmendjen tek rëndësia e kujtesës historike, duke i treguar brezave të rinj se si veprimet e vogla të solidaritetit mund të krijojnë ndryshime të mëdha.
“Shtëpia e Kombit” është një dëshmi e gjallë e një historie të dhimbshme, por edhe një mësim mbi humanizmin, mbështetjen dhe unitetin kombëtar.
Ky reportazh dokumentar e vendos Helenën Halilaj në qendër si një krijuese bashkëkohore që ndërthur poezinë, artin dhe angazhimin social, duke treguar se si kujtimet personale mund të transformohen në histori universale që flasin për të gjithë shoqërinë./Versus.al
